Mig rak í rogastans á föstudagskvöld. Hefur landið verið hertekið af menntleysingjum? Eru ómenntaðir að taka völdin? Ef ég hefði horft á Stöð 2, hefði ég sennilega byrjað að trúa því að svo sé, þ.e. þegar ólangskólagengnu plebbarnir í karaoke-keppninni sem kölluð er Idol, eða Fyrirmyndirnar, hófu upp raust sína. En ég neita að trúa því, ég neita að trúa að Íslendingar séu svona auðveldlega gabbaðir, að þeir haldi að persónuleikasneyddur karaoke-söngur sé ómissandi sjónvarpsefni og frábær réttlæting á því að greiða 99 krónur fyrir að mega senda inn sitt atkvæði. (Lesendum er vinsamlega bent á (í eitt skiptið fyrir öllu að þó undirritaður neiti einhverju, og þó að ég yfir höfuð segi eitthvað, þá hefur það engin áhrif á ytri veruleika (slíkt er eðli allra orða, neikvæðra jafnt sem jákvæðra)). Þegar ég vil sjá karaoke, þá fer ég á Ölver, þar sem hvorki Simmi né Jói segja mér hvers konar síma ég á að kaupa.

Nú spyr ég þjóðina. Viljum við að sjómenn, ómenntaðir sjómenn, séu fyrirmynd barnanna okkar (ég get ekki ímyndað mér að aðrir en börn láti bjóða sér upp á umrætt sjónvarpsefni (börn eru jú heimsk, er það ekki)). Og ef sjómenn eiga vera fyrirmyndir barnanna okkar, eiga það ekki að vera alvöru sjómenn, karlmannlegir jaxlar með tattú sem vilja bara sækja sjóinn fast og ríða hórum í útlöndum, ekki einhverjir aumingjar sem hætta á sjónum til að syngja í ofvaxinni Samfés-keppni. Nei, við viljum það ekki. Ekkert okkar getur fallist á að æska landsins fylkist í kringum þvílíkan falsspámann. Nei, takk. Viljum við ekki frekar að börnin okkar ánetjist eiturlyfjum og lolli einhvern úr Mínus inni á klósetti á Vegamótum fyrir kókaín?

Reyndar var einn keppendanna langskólagenginn (hann hlýtur samt að vera að ljúga). Hann má eiga að hann söng það lag sem komst næst því að vera heimspekilegt (lesendum er vinsamlega bent á (aftur) að orð hafa engin áhrif á ytri veruleika (slíkt er jú eðli orða)). En tók ekki menntaskólafraukan Imagine? Sjálfsagt vilja einhverjir meina að John Lennon hafi verið meiri heimspekingur en Maurice Gibb. En þeir eru þá að gleyma að John Lennon var aldrei í háskóla. John Lennon tók aldrei gráðu í heimspeki og er því ekki heimspekingur.

Ég vil að lokum árétta að ég horfði ekki á umrættsjónarspilá föstudaginn, ég horfði á endursýningu nú síðdegis. Ég naut menningar í Þjóðleikhúsinu, ásamt Seltyrningnum og fleiri frómum Hákólamönnum. Við sáum nýtt íslenskt leikrit, réttilega niðurgreitt af íslenska ríkinu (þó að það hafi reyndar verið frekar leiðinlegt). Að leikritinu loknu brugðum við okkur á Ölver.